NEREA:
Kaixo, Ander. Zer moduz?  

ANDER:
Tira, hainbestean.  

NEREA:
Zer duzu gaurkoan?

ANDER:
Azaroaren 25eko egunaren harira, Emakundeko zuzendari den Miren Elgarrestaren elkarrizketa bat entzun dut eta datuek harrituta eta beldurtuta utzi naute.

NEREA:
Pornografia-kontsumoaren datuez ari zara, ezta?

ANDER:
Izugarria iruditzen zait pornografia kontsumitzen duten gazteen batez besteko adina 12 urte izatea.

NEREA:
Gu adin horretan oso bestelakoak ginen!

ANDER:
Egia da pornografia oso zaharra dela eta historian zehar aldaera ezberdinak hartu dituela. Baina badirudi gaur egun gehien ikusten den pornoa bortitza eta emakumearen aurkako indarkeria matxista erakusten duena dela.

 

AUDIOA | Miren Elgarresta

 

NEREA:
Aipatutako datuen artean, larriena pornoaren % 88,2 emakumearen aurkako indarkeria matxistaren erakusle dela esan du Mirenek.

ANDER:
Eta, jakina, gero jokatzeko modu hori harremanetan errepikatu egiten dute gazteek. Beraz, argi dago horretan arreta guztiok jarri behar dugula, arazo larri baten aurrean baikaude.

ANDER:
Gai honen inguruan egon daitezkeen arazo larri guztien artean, larriena aipatu berri duguna dela esan du Mirenek.

NEREA:
Hau da, besteekin alderatuta, hau da larritasun gehien duena.

ANDER:
Larriena… Halako esamoldeak lantzeko aprobetxatuko dugu. Munduko mendirik altuena Everest den bezalaxe. Eta ba al dakizu zein den Euskal Herriko garaiena?

NEREA:
Ander, mesedez, zertara dator orain mendien gaia? Oso serio ari ginen!

ANDER:
-ena ren adibide gehiago jarri nahi nituen, barkatu! Ez da adibiderik aproposena izan.

NEREA:
Egia esan ez. Pornoaren gaira bueltatuko gara.

ANDER:
Hobe izango da, bai.

NEREA:
Elkarrizketan gaineratu dute, gaur egun mugikorrekin denok oso eskuragarri dugula horrelako edozein irudi eta bideo eta hor eragitea ez dela batere erraza.

AUDIOA | Miren Elgarresta

ANDER:
Elkarrizketatzaileak are zailago egitura erabili du eskuhartzearen zailtasuna oraindik ere zailagoa dela adierazteko.

NEREA:
Norbait haserre dagoenean, «are zailagoa izaten da berarekin lasai hitz egitea».

ANDER:
Atzo norbait dotore zegoela, eta gaur dotoreago dagoela esateko, are dotoreago zaude gaur esan genezake, egunetik egunera, dotoreago baitago.

NEREA:
Gauzak pixkanaka aldatzen joango ahal dira kontuotan! Izan ere, emakume eta gizonezkoen arteko berdintasunaren eta indarkeriaren alorrean konpondu beharreko arazo asko ditugu oraindik.

ANDER:
Hauetako asko larriak izango dira.

NEREA:
Batzuk besteak baino larriagoak ziur aski.

ANDER:
Eta beti egongo da bat, guztien artean larriena dena.

NEREA:
Horixe ikasi dugu gaurkoan.

ANDER:
Edozein adjektibok hainbat maila har ditzakeela esan nahi dugunaren arabera.

NEREA:
Adjektiboa bera erabiliko dugu gauza edo pertsona baten ezaugarri bat adierazteko.

ANDER:
Beste batekin konparatu eta ezaugarri hori handiagoa dela adierazteko, -ago jarriko diogu. «Oso interesgarria da liburu hori, baina aurrekoan irakurri nuena interesgarriagoa iruditu zitzaidan».  

ANDER:
Eta inoiz irakurri dugun liburu onena aipatzeko, «irakurri dudan liburu edo libururik interesgarriena» esango dugu.

Hemen entzun dezakezue Miren Elgarrestari egindako elkarrizketa.