Azken asteetan Euskal Herriko hainbat herritan, ikastetxetan, unibertsitatetan eta beste milaka tokitan M20 irakurri dugu. Kartel, pegata, pankarta eta baliabide ezberdin askotan M20 irakurri dugu. M20 edo Martxoak 20. Eta honekin batera, Euskal Herrirako Hezkuntza bat aldarrikatzen duten adierazpenak.

Martxoaren 20an greba deialdia zabaldu zuen Ikamak, Ikasleria martxan antolakundeak, «ikasleon eta hezkuntza komunitarioaren beharrak ez direla asetzen ikusten dugu eta oraindik pausoak eman behar ditugula», azaldu du Garazi Ubiria bozeramaileetako batek.

Hori dela eta antolatu zuten ikasleak kalera ateratzeko greba; Ubiriaren ustetan, ikasleak beharrezkoak baitira mugimendu honetan: «Argi dugu ikasleok paper garrantzitsu bat jokatzen dugula lortu nahi dugun Euskal Herriko sistema publiko eta komunitario baten alde lanean jarraitzeko».

Helburuak argi ditu Ikamak: «Gure helburu nagusia Euskal Herriko hezkuntza publiko eta komunitarioa da; gaur egungo hezkuntza sistemak ez du ikasleen benetako parte hartzea sustatzen eta ez die ikasleen betebeharrei erantzuten». Hezkuntza ereduan aldaketa bat emateko beharraren aurrean mobilizatzen jarraituko du Ikamak; hortaz eta gehiagoz aritu gara gaur Bigarren Kafean.