Apirilaren 11n joan beharko dute Euskal Herrian Euskarazeko bi kidek auzitegira abenduan Baionako auzitegian «Justizia euskararentzat» margoketa egiteagatik, Gorka Torre da horietako bat. NAIZ Irratian azaldu du ekimenarekin aldarri orokor bat plazaratu nahi zutela, «euskarari eman diezaioten zor zaion errespetua eta guk Euskal Herrian euskaraz bizi osoa normaltasun osoz egin ahal izateko». 

Epaiketa salatzeko eta aldarri orokorra plazaratzeko hitzordua eman du EHEk igande honetarako Baionan, Torreren esanetan «argi da jauzi bat egin behar dugula euskaltzale guztiok euskararen alde». Euskararen aurkako oldarraldia deitoratu du Torrek eta euskararen aldeko bidea indartu behar dela dio, «euskararen alde egin duguna ez da nahikoa, euskararen aldeko jarrera piztu behar dugu, euskarak askoz gehiago eskatzen digu». 

Igandeko Baionako hitzorduan Euskal Herri osotik gerturatutako herritarrak espero dituzte, «erakutsi behar dugu euskararen problematika herri oso baten problematika dela».