Adineko mahaia Telesforo Monzonek eta Iñaki Ruiz de Pinedok osatu behar zuten 1980ko martxoaren 31n Gernikako Batzar Etxean lehen aldiz elkartu zen parlamentu hartan, baina Herri Batasunak ez parte hartzea erabaki zuen. Instituzio autonomikoak osatu zirenean garaiko ezker abertzalean izandako eztabaiden ingurukoak kontatu dituzte Ruiz de Pinedok berak eta Patxi Zabaletak NAIZ Irratian.

Ausentzia, nolabait, hautatu horretatik harago, ausentzia behartuak ere izan ziren. Iñaki Pikabearena, adibidez. HBk bere zerrendetan aurkeztu eta herritarren ordezkari gisa bertan behar zuen, baina ez zioten utzi, espetxean zegoen. 45. urteurrenean bertan egon ahal izan du Pikabeak eta ordukoak gogoratu ditu NAIZ Irratiaren saio berezian.

Abiatze hartan ausentzia sonatua emakumeena izan zen. Beste bi urte pasa beharko ziren lehen aldiz emakume batek Araba, Bizkaia eta Gipuzkoako herritarren ordezkaritza ganberan hitza hartzeko. Begoña Amunarriz izan zen, UCDren mozio bati zuzenketa aurkezteko hartu zuen hitza, berandu baino lehen Parlamentuan emakumeen ordezkaritza egokia izatea eskatuz egin zuen hitz hartzea.

Ausentzietan ausentzia, hala ere, Nafarroarena izan zen. Astelehen honetan Gernikan izan den ekitaldian oraindik ere sarrerako ertzainen gerrikoan ikus zitekeen nafar zeinua, gerora hutsune gorri mingarri bilakatutakoa. Nahi eta ezinaren adierazle. Bakartxo Tejeria egungo Legebiltzarreko presidenteak NAIZ Irratian hutsuneez baino eraiki diren parez pareko harremanez hitz egin nahi izan du.

Oroimen eguna izan da Gernikakoa, garai berri baten hasiera gogoratzekoa, ausentzia hautatuek eta behartuek marraztu zuten garai berri baten mugarrietako bat oroitzekoa.