NEREA:
Kaixo, Ander. Zer moduz zaude?

ANDER:
Ondo, eskerrik asko!

NEREA:
Pozten naiz. Gaur, galdera batekin hasi nahi nuke.  

ANDER:
Hasteko galdera izanik, ez da konplikatua izango, ezta?

NEREA:
Ez, lasai. Zer da zuretzat arrakasta?

ANDER:
Ene! Galdera sakona ekarri duzu gaurko saioarekin hasteko!

NEREA:
Zuk ezagutzen duzu Zuhaitz Gurrutxaga, ezta? Hainbat taldetan aritutako futbolari-ohia, telebistako aurkezle, antzezle eta bakarrizketetan aritzen dena.

ANDER:
Ezagutuko ez dut, ba! Oso interesgarria iruditu zitzaidan bere NOK-ei buruz sortu zuen bakarrizketa.

NEREA:
NOK  edo nahasmendu obsesibo konpultsiboa. Jende askok TOC bezala ezagutzen du.

ANDER:
Ezinbestekoa da horrelako gai eta gaitzei buruz hitz egitea.

NEREA:
Are gehiago, akaso, berak aipatzen duen bezala, gai mental edota psikologiari hain garrantzi gutxi ematen zaion mundu batean.

ANDER:
Futbolean, hain zuzen ere.

NEREA:
Beti egin zait bitxia futbola utzi eta ondoren bakarrizketa eta antzerki munduan sartzea. Zerk eramango ote zuen erabaki hori hartzera?

ANDER:
Ziur horri buruz mintzatzen dela Ander Izagirrerekin batera idatzi duen ‘Subcampeón’ liburuan.

NEREA:
Jarraian entzungo dugun irratsaioan ere, horri buruzko zertzelada batzuk eman zituen. Entzun dezagun.

 

AUDIOA - Zuhaitz Gurrutxaga

NEREA:
Badirudi Zuhaitzek ez duela guztiz argi nolatan eman zuen jauzi hori futboletik telebistara eta antzerki mundura, baina badu zergatiaren irudipen bat.

ANDER:
Eta, hori adierazteko, «irudipen bat dut ez ote den» egitura erabili du.

NEREA:
Izan ere, askotan ziurtasun osoa ez dugunean, ote partikula erabiltzen dugu.

ANDER:
Zalantza adierazteko erabiltzen denez, galderetan ikusi ohi dugu. «Non ote daude nire giltzak»?

NEREA:
Galdera erretorikoak egiteko balio du, norberak bere buruari egiten dizkionak. «Etorriko ote da»?

ANDER:
Askotan susmoak eta beldurrak ere adierazten ditu. Adibidez, «beldur naiz ez ote garen garaiz iritsiko».

NEREA:
Kasu horretan ez da galdera, zehar galdera baizik; hizlariaren beldurra adierazten du.

ANDER:
Zuhaitzek beldurrak alde batera utzi zituen, eta, futbolean jasandako presioa gaindituta, jendartean jarri zen antzezle lanetan.

NEREA:
Badirudi futbolari gisa urtetan sentitutako porrot hori gainditu nahi izan zuela horrela, fokoa beste leku batean jarri eta bertan arrakasta izateko.

ANDER:
Horrela, aurretik dezepzionatu zuen jendearen aurrean lasai egoteko eta begietara begiratzeko gai izatea lortu zuen. Jende gutxiago aurrean, baina bere buruaren barruan beste egoera bat.

NEREA:
Bere hitzetan arrakasta lortu zuen.

ANDER:
Hori izango ote da arrakasta?

 

AUDIOA  - Zuhaitz Gurrutxaga

 

NEREA:
Ez dakit arrakasta izango ote den, baina badirudi Zuhaitz gustura dagoela lortutakoarekin.

ANDER:
Nik esango nuke arrakasta oso pertsonala dela, bakoitzak bere helburuak zehazten baititu, eta, horren arabera, arlo batean edo bestean bakoitzak ezarriko du bere muga.

NEREA:
Bat nator zurekin, Ander. Ez da kontzeptu erraza, baina hausnarketarako ematen du.

ANDER:
Baita euskarako kontzeptu berriak ikasteko ere!

Hemen entzun dezakezue Zuhaitz Gurrutxagari eta Ander Izagirreri egindako elkarrizketa.