ANDER:
Kaixo, Nerea. Zer moduz zaude?

NEREA:
Ondo, eskerrik asko!

ANDER:
Aizu, zuri irakurtzea gustatzen al zaizu?

NEREA:
Izugarri, bai. Mundu berrietan barneratzea zoragarria da.

ANDER:
Zein liburuk utzi zaitu txundituta azken bolada honetan?

NEREA:
Oraintxe ez dut gogoan izenburua, baina gaiaz oroitzen naiz: misterio liburu bat izan da, hilketa bat ikertzen duen detektibe-talde batena. Horrelako istorioak asko gustatzen zaizkit.   

ANDER:
Niri, berriz, umorea egiten duten idazleak izugarri gustatzen zaizkit, baita umorez betetako bakarrizketak eta antzezlanak ere.

NEREA:
Ez dugu maiz izaten erraz eta era naturalean barre egiteko aukera.

ANDER:
Ez, are zailagoa da guri algarak ateratzea.  

NEREA:
Ba begira, badut zuretzat liburu-proposamen bat. Ander Izagirrek eta Zuhaitz Gurrutxagak elkarrekin sortutako Subcampeón. Entzun dudanagatik, ziur algarak aterako dizkizula.

ANDER:
Entzun dut zer edo zer, bai. Elkarrekin askotan egon omen dira eta batek istorioak laburrean jaso eta besteak literario moduan idatzi ditu, arte handiarekin. Liburuaren sorkuntzan murgilduta zeudela, Anderri behin baino gehiagotan algarak atera zitzaizkion.

AUDIOA  - Ander Izagirre 

ANDER:
Anderrek esaten duen bezala, irribarrea eragitea erraza izan daiteke, baina algarak ateratzeko, gaitasun berezia behar da.

NEREA:
Badirudi berezkoa duela gaitasun hori Zuhaitzek, eta, gainera, bat-batean (bapatean) sortzen omen ditu algarak bere bakarrizketetan.

ANDER:
Zein ederra izaten den naturalki algaraka barreari ezin eutsi egotea, ezta?

NEREA:
Barrez lehertzea benetan zoragarria da!

ANDER:
Zuk maiz egiten al duzu barre amaierarik ez balego bezala?

NEREA:
Barre maiz egiten dut, baina barrez lehertzea ez da erraza.

NEREA:
Ziur Ander eta Zuhaitzek ere momentu atseginak pasatu dituztela liburua sortzen.

ANDER:
Nola hasi ziren liburu hau elkarrekin idazten?

NEREA:
Zuhaitzek bere hainbat istoriorekin liburu bat idazteko gogoa omen zuen, eta, Anderren liburu batzuk irakurriak zituenez, gustura luzatu zion proposamena. Izan ere, idazleak umorea egiteko duen finezia gustuko zuen Zuhaitzek.

AUDIOA| Ander Izagirre

ANDER:
Elkarrekin izandako lehen elkarrizketatik Ander aho zabalik utzi omen zuen Zuhaitzek kontatutako istorioekin.

NEREA:
Hau da, harrituta, ezer ezin erantzunda gelditu zen, entzuten zuenari adi.

ANDER:
Hori da, zur eta lur geratu zela ere esan genezake.

NEREA:
Edota harri eta zur.

ANDER:
Zenbat aukera zerbaitek txundituta utzi gaituela esateko.

NEREA:
Hainbat esamolde ditu euskarak harridura adierazteko.

ANDER:
Horietako batzuk aipaturikoak: zur eta lur, harri eta zur, aho zabalik.