Bide luze eta emankorra egin du dagoeneko Iker Gurrutxagak gidatzen duen MusikHaria saioak. Euskal musikarien lanak patxadaz aztertzeko lekua da, bere sorreratik disko baten atzean dagoen lan izugarria sakon eta zehatz aztertzeko irratsaioa izan da. Hil honen amaieran 1.000. saioa izango du MusikHariak eta bere komunitatearekin zuzenean ospatzeko jaia antolatu du NAIZ Irratiak.

Donostiako Dabadaba aretoan izango da irratsaio berezia, martxoaren 25ean, asteartez, 19.00tatik aurrera (18.30ean irekiko dira ateak). MusikHariko ohiko kolaboratzaileak bertan izango dira eta zuzeneko musika ere bai. Emanaldi bereziak eskainiko dituzte hainbat euskal musikarik, euren dohainak gurutzatuz. Elkarrekin ikusi eta entzun ahalko ditugu Lide Hernando eta Iker Lauroba, Olaia Inziarte eta Olatz Salvador eta Gartxot Unsain eta Izaro Andres.

Orain arteko bidea ospatu eta egiteko dagoen guztiari begira jartzeko emanaldi berezia izango da Dabadabakoa. Gonbidapen bidez bertaratzeko aukera zegoen hasieran, baina aforoa bete egin da. Hala ere, nahi duen orok jarraitu ahal izateko, NAIZek zuzenean eskainiko du saio berezia bideo-streaminean eta NAIZ Irratian ere entzun ahalko da. 

NAIZen egitasmo berria

Sorpresa berezi bat ere izango da saio honetan. Bere sorreratik gure musikaren aldeko apustua egin du NAIZek eta horren lekuko dira hainbat jaialdiri emandako babesa, NAIZ Kontzertuak ekimena, Bidegurutzean telebista saioa eta NAIZen bertan eta NAIZ Irratian bertako sortzaileek duten espazio zabala. Orain bide berri bat abiatzera doa NAIZ eta MusikHariaren 1.000 saio honetan ezagutaraziko du egitasmo berria.