Elektronikaren munduan esploratuz denetariko doinuak jorratu ditu Zilibito Records talde oiartzuarrak ‘Deabruen doinuak’ debuteko diskoan. Kolaborazio asko dituen lana da eta technoa, reggaetoia edota funk brasildarreko doinuak topatu daitezke diskoak dituen hamahiru abestietan.

Deabruari buruzko erreferentzia bat baino gehiago topatu daiteke kantuen hitzetan, baina azkenean deabrua norberak barruan daraman hori dela konturatzen gara beren unibertsoan murgiltzen garenean. Mr. Luken, Malakias, Muitiko, Xsakara, Etxepe kolektiboa edota Rally 48 taldea izan dira diskoan parte hartu dutenak, bakoitzak bere alea jarriz kolaboratu duten abestiari.

Zuzeneko dezente eskaini dituzte diskoa kaleratu duten honetan, Markina eta Aguraingo gaztetxeetan, Donostiako DabaDaban, Zornotzako Musikagaz jaialdian, Amurrioko gaztetxean edota Villabonako Sharijain izan dira lana aurkeztuz, azken horretan, gainera, Mr. Luken oholtza partekatzen zutela.

Momentuz, datorren data ZEID Fest Gaztea jaialdian izango da, apirilaren 5ean eta bertan ere izango da aukerarik haiekin deabrukeriatan aritzeko. Bitartean, diskoa entzuteaz gainera, MusikHaria saioan izan genuen elkarrizketa entzuteko aukera duzue goiko aldean.