Ad Libitum saioetan  musika izango dugu hizketagai, beti ere modu askean, atal bakoitzean gai ezberdin bat jorratuz. Denboraldiko lehendabiziko atalean funk musika izan dugu abiapuntu.  Eta lehen saio honetan zera diogu: Groove! Groove! Groove!

Mugimendua edo dantza bultzatzen duen musika mota bat deskribatzeko erabiltzen da askotan Groove terminoa. Azken finean, groove-a erritmo jakin batean mugitzera bultzatzen zaituen sentsazio erritmikoa da. Dantzatzean groove mota alda daiteke, une horretan entzuten den musika islatzeko.

Baina, murgil gaitezen aste honetako gaian: funk-ean. AEBetan 1960. hamarkadan jaio zen musika estilo dantzagarri honek ordura arteko genero asko irauli zituen. ’Funk’ hitzak kiratsa esan nahi du, eta komunitate afro-amerikarrak euren kontra erabilitako irain hau bereganatu zuen estilo berri honi izena jartzeko.

Funkaren errege James Brown-etik hasita, generoaren inguruko zertzelada tekniko eta historikoak azaldu ditugu irratsaioan. Hurrengo hamarkadetan sortutako azpi-genero batzuk ere ezagutu ditugu, hala nola disko musika, acid jazza edota funk-rocka, baita horiek jorratu dituzten artistei buruz hitz egin ere: Earth Wind & Fire, Chaka Khan, Jamiroquai, Janelle Monae edota Red Hot Chilli Peppers berberak.

Euskal Herrian ere funk-ak izan zuen sarbidea, noski, nahiz hamarkada bat beranduago izan; eta, hainbat adibide izan diren arren, Jotakie bezalako taldeez ere hitz egingo dugu.

Groovez betetako ordu batez gozatu nahi?