Lehendabizi Oier Lazkanoren (Movistar) ihesaldiarekin itxaropentsu, ondoren Vingegaardek (Visma) Pogacarren (UAE) erasoari emandako erantzunarekin harrituta eta azkenik, esloveniarraren nagusitasuna txalotuz, Gorka Izagirrek NAIZ Irratian jarraitu du Frantziako Tourreko 4. etapa, Galibier mendate esanguratsutik igaro dena.  

Ormaiztegiarra, aurten Cofidis taldeak fitxatuta, ez da Tourrean lehiatzen ari; bai, ordea, bere anaia eta taldekide Ion. Gorkak onartu du etxetik lasai ari dela jarraitzen itzuli handi hau. Hamar aldiz lehiatu da bertan, 2011n debuta eginez. Oroitzapen politak dituela onartu du, nahiz eta sekula ez duen garaipenik pilatu. Morroi lanetan ikusi izan dugu sarritan baina onartu du lehiatzeko gosea itzaltzen ari zaiola. Ordiziako Klasikan, ikusiko dugu berriro ere. Etxe alboko hauspoa sentitzeko gogotsu dago.

Aurten Cofidis taldearekin egindako denboraldi honetan, bazeneukan egituraren ezagutza bat anaia ere bertan dagoelako. Nolakoa izan da Cofidisen lurreratzea?

Egia esan ez da nire denboraldirik egokiena izaten ari, garbi esanda. Kostatzen ari zait. Hor nabil, nahi eta ezin batean. Lehendabiziko zati hau bukatu dut, asko luzatu dut denboraldiko lehen zati hau, lasterketa askorekin eta abar, gustatuko litzaidake deskantsoko zati hauek lehenago hartzea. Baina tira, aurreko astean hartu nituen eta gogotsu ekingo diot bigarren zatiari.

Zein plan daukazu denboraldiaren bigarren zati honetarako?

Ez daukat ongi definitua baina etxean hasiko naiz, Ordiziko lasterketarekin. Gogoarekin nago, etxean izango diren lasterketak dira, ezagutzen ditut.

Ondoren, baduzu Espainiako Vueltako taldean izateko aukera edo ideiarik?

Ez dut Espainiako Itzulirik egingo. Lasterketak eta itzuliak badaude, Polonian eta Kanadan izango naiz seguraski.

Zer da gorputzak gehien eskatzen dizuna?

Ez daukat goserik egia esan Espainiako Itzulia egiteko. Taldearen aldetik, galdetu didate ea nahi dudan baina egia esan, ez daukat goserik. Nire erantzuna horixe izan da. Hiru asteko itzulietatik gehiena kostatu izan zaidana da, ibilbide motengatik, denboraldiko hirugarrena delako edo ez dakit zergatik. Dakidana da ez dudala inoiz lortu ongi ibiltzea. Bai eduki dut itzuli honekiko errezelo bat, ez dut oso maiteko eduki. Tourrean oso egun politak bizitakoa naiz, Giroan ere bai baina Espainiako Itzulian ez. Hori ere hor daukat eta kirolari bezala ez dit asko betetzen eta nahiago dut beste egutegi bat.

«Ez daukat goserik, egia esan, Espainiako Itzulia egiteko. Hiru asteko itzulietatik gehiena kostatu izan zaidana da; itzuli honekiko errezelo bat daukat, ez dut oso maiteko eduki»

Oroitzapen edo burura datozkizun sentipen horiekin, denboraldiaren bigarren kolpe honetan izango dituzun lasterketan, Ordizioako Klasikoak esaterako, oroitzapen oso politak ekartzen dizkizu. Bada nolabait denboraldiari berriro neurria hartzeko gustoko lasterketa bat.

Bai, zalantzarik gabe. Nire ibilbide honetan, etxeko lasterketa izateaz aparte, hiru garaipen horiekin, oso gustoko dudan lasterketa da. Urte luzez lehiatu gabe egon naizen lasterketa bat da. Horrek ere motibatu egiten dit. Gogotsu hartzeko arrazoi bat bada eta horretan saiatuko naiz.

Entrenamenduetan motibazio bila egiten dira lehiaketa proiekzioak. Larraitzetik Zaldibira doan errepide horretan, maldan behera, kilometro asko egingo zenituen eta egingo dituzu. Eta hor pilatuko zaizkizu garaipen ezberdinen bizipenak, ezta?

Bai, hala da. Entrenamenduetan ez naiz melankoliko jartzen baina hala da. Oso ondo ezagutzen ditudan errepideak dira. UmetAN, lasterketak egiten hasi ginenetik, Larraitzeko buelta ematen genuen, alde batetik edo bestetik, eta orain ere handik ibiltzen gara.

Espainiako Vueltarako goserik ez, aurtengo denboraldiak ez dizula gizalarru gozoegirik utzi esan duzu baina Gorka Izagirrek badu gosea txirrindulari izaten jarraitzeko?

Ba denboraldi hasiera gose handiarekin hasi nintzen baina orain zalantza asko ditut. Ikusiko dugu, ez dakit zer gertatuko den hemendik aurrera Gorka Izagirrerekin.