Kuriosoa da nola kulturak organo bat guztiz ezabatzen duen: ez du bisturirik behar, gezurrak sistematikoki errepikatzea edo egia ez esatea besterik ez. Pentsa dezagun atea non dagoen edo koilarak non gordetzen diren ez dakigun etxe batean bizi garela. Absurdoa ezta? Bada, horrela bizi gara gutako asko gure gorputzean: gauzak non ditugun edo zertarako balio duten jakin gabe. Hori honela izanik, testu honek, funtsean, pertzepzio hori aldatzea du helburu.