Zuzenean
Ostegun honetan bozkatuko dute Espainiako gobernuak CCOO eta UGT sindikatuekin eta patronalarekin adostutako lan erreforma Kongresuan. Negoziazioak azken unerarte luzatzea normala, «ohikoa» dela dio Roberto Uriarte Undias Podemoseko diputatuak, eta azken unean bada ere, «akordioa lortuko dela» uste du.
EAJko buru Andoni Ortuzarrek salatu ostean erreforma moldatu ezin izateak beto eskubidea aitortzen diola patronalari, Uriartek adierazi du EAJk ez duela «inoiz enpresariekin adosturiko arau baten aurka bozkatu». Bere irudiko ez EAJk, ezta EH Bildu eta ERCk ere ez dute aurka bozkatuko, PP eta VOXekin batera bozkatzea ekarriko lukeelako.
Ildo horretan, gehiengo sindikalak asteburu honetan egin dituen eskaerei erantzunez, ez du aparteko «arazorik» ikusten alderdi moreko diputatuak; «erkidegoetako hitzarmenak ez daude arriskuan», gehitu du.
Portugal, gazi-gozo
Portugalen alderdi sozialistak hauteskundeak irabazi eta biharamunean, emaitzak gazi-gozotzat hartu ditu: «Albiste ona da alderdi sozialistak gobernatzen jarraituko duelako, baina albiste txarra ultraeskuina parlamentuan sartu delako lehen aldiz». Aurreko agintaldian alderdi sozialistak ezinbesteko aliatu izan duen Ezkerreko Blokeak emaitza kaskarrak jaso ditu, %4ko babesarekin; neurri batean, hauek aurrekontuak babestu nahi ez izanak eragin du Antonio Costak hauteskundeak aurreratu izanak. Eremu honetan irakaspenik atera ote duten galdetuta, Uriartek dio ezberdina dela Estatu espainiarreko egoera, hemen Unidas Podemos gobernu barnean dagoelako. Gaineratu nahi izan du PSOE eta alderdi morearen gobernua «osasuntsu» dagoela, baita «indar soberanistekin gobernuak duen elkarlana» ere.
Bestalde, Elizaren inmatrikulazio aferaren inguruan, gogoratu du «publikoa zena pribatizatu» zuela bere garaian, Aznarren politikak lagun, eliza katolikoak, eta beraz, «herriarena dena herrira» itzuli behar duela bere osotasunean.