Greba orokorra aurreikusi arren, zehazteke dago noiz izango den. «LAB sindikatuaren ustetan, ez du Madrilen daten araberakoa izan behar. Badaude baldintzak eta arrazoi nahiko urtea bukatu baino lehen greba hori egiteko», adierazi du Garbiñe Aranburu idazkari nagusiak NAIZ Irratian.

Sindikatu abertzaleak programa sozioekonomikoa bukatu berri du, eta bertan banaketa hirukoitzaren aldarrikapena jaso da, sistema kapitalista, hetero-patriarkala eta «ekozidarekiko» aldaketa. «Aldaketa sakonak behar dira. Trantsizio bat egin behar da eredu berri baterako. Aldaketa hori ekosozialista eta feminista izan behar da. Horrek eskatzen du indarrean dagoen produkzio eta kontsumo eredua aldatzea».

Ildo beretik, 30 orduko lanaldia eta zaintza partekatua proposatu du sindikatuak. «Oso garbi dago eta estatistika guztiek adierazten dute emakumeek zaintza lanetan askoz denbora gehiago ematen dutela. Horregatik lanaldi murrizketa iruditzen zaigu enplegua banatzeko modu bat eta baita zaintza lanak guztion artean banatzeko modu bat».