«Bileran geunden bitartean prentsa oharra medioei helarazi zieten». Hori izan zen ELA, LAB, SME, CCOO eta UGT sindikatuetako ordezkariak bilera mahaitik altxatu eta alde egiteko arrazoi nagusia ELA sindikatuko Esther Saavedrak Informazioaren Harian azaldu duenez. Ez, ordea, bakarra. Nabarmendu du bilera aurretik ere ez zeudela batere ados Osakidetzak ez zuelako protestetan aldarrikatutako neurri bakar bat ere kontutan hartu.

Bilera horretan, Osakidetzak 196 profesional gehiago kontratatzeko asmoa erakutsi zuen, 21 milioi euroko inbertsioa egitekoa eta Lehen Arretako administrazioko langileen soldata Osakidetzako gainerako administrazioko langileekin parekatzeko asmoa ere bai. «Guretzako oso neurri eskasak dira». Saavedrak azaldu du neurriak ez direla nahikoak ELA sindikatuarentzat, kontuan hartuta Lehen Arretako langileek dutela orain Covid-19a antzemateko frogak egitearen ardura, eta iristen denean, txertoa ematearen ardura ere eurek izango dutela.

«Guk hitz egiteari ez dizkiogu ateak itxi». Gertatutakoa gertatuta ere, Saavedrak azaldu du berriro hitz egiteko prest daudela eurak behintzat, eta zerbait lortu arte mobilizazioak eta protestak deitzen jarraituko dutela iragarri du.