Zalo Urain musikaria gonbidatu dugu Emen Gonak saiora. Hemendik aurrera,  emakume musikari euskaldunak lekua izango dute saioan eta beraiekin luze eta lasai hitz egiteko aukera izango dugu. Zaloa Urain 'Kokein' taldeko abeslaria izan da lehendabiziko gonbidatua, aurten 20 urte betetzen ditu taldeak.

Haren ahotsak rockaren indarra eta leuntasuna era berean iradoki digu hogei urteko bere ibilbide oparoan zehar. Gai ugariren inguruan hitz egin dugu,  taldeko sorreraz eta musika eraginetaz, ahotsa eta jarreraren garapenaz, gizonen eszenan berezko femeninotasun bat aldarrikatu izanaz, amatasun eredu berrietaz, bizi dugun kulturaren prekarietateaz eta noski,  taldearen 20. urteurrenaz.