Aste Nagusirik ez, baina herriak «irribarrea, ilusioa eta esperantza» behar dituelako, 'Aste Nahasia' antolatzen aritu dira azken hilabeteetan Bilboko Konpartsak. Egitarau xumea, beharrezko segurtasun neurriekin. Azkenean, ordea, «covid-ak azken asteetan izan duen bilakaerak» eraginda, egitasmoa bertan behera uztea erabaki dute, Haizea Arriola Bilboko Konpartsetako ordezkariak Naiz Irratian azaldu duen moduan.

'Aste Nahasia' antolatzen hasi zirenean jakin bazekiten egoeraren bilakaeraren arabera atzera egin beharko zutela akaso. Lanean aritu dira, edonola, «eskeintza xumea bat» prestatzen, baina azkenean ezin izan dute aurrera jo.

Bilboko Udalak baztertu egin ditu Konpartsak

Astelehenean Bilboko Udalarekin bildu ziren Konpartsak eta Arriolak baieztatu duenez, Aburtoren exekutiboak hartua zuen jada ekintza oro bertan behera uzteko erabakia. Oro har, Aste Nagusiari begira, Udalak alde bakarrez jokatu duela kritikatu du Bilboko Konpartsetako ordezkariak. «Pandemia hasi zenetik Udalarekin bildu nahian aritu gara, Aste Nagusiaren inguruan zer gertatuko zen elkarrekin erabakitzen hasteko baina hasieratik alde bakarreko erabakiak hartu dituzte gurekin ezertarako kontatu gabe». Jarrera honek Bilboko 28 Konpartsak «mindu» egin  dituela gaineratu du Arriolak.