Astelehenean Emakumeen Aurkako Indarkeriaren Kontrako nazioarteko eguna izango da. Astelehena izaki pentsiodunek mobilizazioak egingo dituzte hiri eta herrietan, pentsio duinak exijituz. Ondorioz, Oneka Euskal Emakume Pentsiodunen plataforma gaur irten da kalera Donostian eta Bilbon emakumeen aurkako indarkeriaren aurrean bere aldarrikapenak zabaltzera.

Ana Mezo Onekako ordezkariak azaldu digu «emakume nagusien aurkako genero indarkeriaren gainean» hausnarketa zabalik dutela plataforman. Azaldu du «65 urtetik gorako emakumeen aurkako indarkeria identifikatzen» ari direla eta «oso errealitate gordina» dela baieztatu du. «Indarkeria mota askotakoa da, izan daiteke irainak jasotzea, bakardadea, indarkeria ekonomikoa, fisikoa -duda barik- eta psikikoa».

Mezok azaldu duenez, semeek euren amen aurka darabilten indarkeria ere ari dira ikusten. «Orain identifikatzen ari garena da zoritxarrez semeak etxera berriro bueltatzen direnean, banatu direlako edo delakoagatik, eta batez ere ama alarguna denean, indarkeria kasuak daudela».