Garaian sorpresan harrapatu gintuen proiektua izan zen Arima taldea. Intimoa bezain indartsua zen proposamena plazaratu zuen lehendabiziko ‘Metamorphosis’ lan hartan. Bonberenea Ekintzakekin hasi zen elkarlanean eta hasieratik izan dute bidelagun, baita Karlos Osinaga ‘Txap’ teknikaria ere, haren eskua eta soinua nabariak baitira diskoz disko. ‘Ez dago amor’ etorri da 2025aren hondarrean, Aloud Music zigiluarekin elkarlanean plazaratutako lana. Hirukote bera mantentzen da taldean, Paule Bilbao ahotsean eta gitarran, Gontzal Bilbao baterian eta Josu Gonzalez baxuan. «EPa gaurdaino nire gogoko formatua dela esan genezake, nahiz eta azken lan honek baduen album formatuaren itxurarik. LP gisan ere aurkeztu daiteke, nahiz eta sei kantu izan», aipatu digu Bilbaok NAIZ Irratiko MusikHaria saioan.

Konposatzeko modua ere aldatu dela aipatu digu musikari bizkaitarrak: «Madrilen egon nintzen sasoian egin nituen konposaketa lanak eta aurre-produkzio lanetan ere bakarrik aritu nintzen. Gainerako diskoetan ez da horrela izan eta pauso bat aurrera ematea izan da hori. Gero taldera eraman eta pare bat asteburutan beren ekarpenak gehitu genizkion lanari. Baina aurretik pentsatuta nituen bai bateriak, sinteak, baxuak… eta hortik estudiora sartu ginen».

Testurak eta jolasa

‘Hegazkina’ da diskoa zabaltzen duen kantua, atmosferikoa bezain tribala, intro moduan datorren abestia baina bitxikeria bat gordetzen duena. Izan ere diskoa ixten duen ‘Aztarnak’ kantuaren hitz berak ditu kantuak. Norbaitek bidaia baten moduan plantea dezake eta zentzua zeharo aldatu lehen eta azken abestiaren artean, mezua era batera edo bestera ulertuz. Errezitatzen entzun dezakegu Paule eta koral moduko bat ere suma daiteke geruzen artean, izan ere, ahotsak protagonismo berezia hartu duela esan genezake taldearen laugarren lan honetan. Testurak ere garrantzia berezia hartu dute lanez lan eta hori nabarmen geratu da kantuz kantu.

‘Ispilua’, ‘Isurkari’, ‘Jantzia’ eta ‘Zarata’ dira gainerako lau abestiak. Sokak, sitarra eta zeharkako flauta, azken hau Enrico Varagnolok jotakoa, bezalako instrumentuak entzun ditzakegu ohiko distortsio, oihartzun eta indarraren artean. Iluntasun dosi altuko diskoa den arren, argitasun puntu ugari ere topa ditzakegu diskoko sei pisten artean.

Kantuen hitzetan ere gogoetarako tarte zabala, nahiz eta barrua hustu izanaren sentsazioa nahikoa agerian geratu den Paule Bilbaok landu dituen abestietan. Erreferentzia moduan Sonic Youth taldeko Kim Gordon musikari estatubatuarra aipatu du nagusiki, «abesti ez hain melodikoak eta zuzenagoak egin nahi» izan dituelako.

Bira hastear

Martxoan izango ditu lehen emanaldiak Arima taldeak eta horietatik aurrenengoa Tolosako Bonberenean izango da, martxoaren 7an. Atzetik, 26an, Bilboko Kafe Antzokiko Kutxa Beltzean eta, 27an, Gasteizko Kubik aretoan. Sarrerak eskuratu daitezke eta diskoa, berriz, sarean entzun.