Espainiako hauteskundeetako kanpaina Nafarroako Gobernuaren osaerarako negoziazio betean iritsi da eta Madrilera baino elkarrizketa horien emaitzari begira izan da Maria Solana Geroa Bairen Kongresurako hautagaia NAIZ Irratian. 

Uztailaren 23ko hitzordutik hasita, erronka garbia du hautagaiak, 2019an galdu zuten Kongresuko eserlekua berreskuratzea. Zertarako? «Nafarren ahotsa entzun dadin, beste batzuen eskutik ez baita askorik entzun». 

Tartean, ordea, Nafarroako Gobernua osatzeko negoziaketak ari dira izaten eta Maria Chiviteren balizko inbestidura hauteskunde horien ostean izango dela dirudi. «Mehatxua» da Ramon Alzorriz PSNko antolakuntza idazkariak aipatutako balizko hauteskunde errepikapena, bere hitzetan, baina dio «mehatxua euskal herritarrentzat, agian, Maria Chivite edozein preziotan lehendakari egitea» izan daitekeela. Ez dio hauteskunde errepikapenari aterik itxi, «hala izan behar badu, hala izango da».