Egoera epidemiologikoaren okertzeak Hatortxu Rock 25. edizioa bertan behera uztera behartu ditu antolatzaileak. Baina Hatortxu itzuliko da, eta ohi baino lehenago, «uztailera begira buru belarri lanean jarriko gara eta espero dugu harrera oraingoak izan duen bezain beroa izatea» adierazi du Aitor Agirrezabal antolatzaileak. Uztailaren 29an eta 30ean jarrita dago hitzordua Atarrabian. Agirrezabalek gogorarazi du azken bi urteetan euskal preso eta haien senideekiko elkartasunez egindako ekimen gehienak bertan behera gelditu direla, eta gaur egun premia handia dagoela.

Egungo egoerak ziurgabetasun handiegia eragin du, eta proiektuaren «bideragarritasuna» kolokan jartzeko prest ez daudela dio Agirrezabalek, «galera ekonomikoak baditugu, baina galera horiek bihartik aurrera 10 aldiz biderkatuko lirateke».

Sarrera erosi dutenek, abenduaren 2an jasoko dute mezu elektroniko bat, nahi izanez gero dirua berreskuratzeko, antolatzaileek azaldu dutenez.