Ion Garate
Entrevista
Ion Izagirre
Astana taldeko txirrindularia

«Lutsenko hor aurrean egonda podiuma ere gauza erreala da, etapa garaipenak baztertu gabe»

Etapa garaipena gertu izan zuen Ion Izagirrek (Astana) larunbatean baina azkenean Dylen Teuns izan zen garaile Le Grand-Bornanden amaitutako etapan. Pogacar-ek emandako ikuskizunarekin zur eta lur geratu zela onartu du NAIZ Irratian. Ormaiztegikoa prest dago beste ihesaldiren batean sartzeko. 

Audio_placeholder

Atseden egunean indarrak berreskuratu eta beste ihesaldi bat egiteko prest dago Ion Izagirre.

Loading player...
Ion Izagirre, larunbateko etapan. (GETTY IMAGES)
Ion Izagirre, larunbateko etapan. (GETTY IMAGES)

Lehen atseden eguna daukazue astelehen honetan eta a ze lehen astea izan duzuen. Zer moduz zaude?

Ondo, lehenengo eguneko erorketa ikututa utzi zidan, muskularki asko sufritu dut egunotan. Baina egia esan herenegungo ihesaldia hartuta sentsazioak berreskuratu nituen, atzo ere oso ondo aurkitu nintzen. Motibazioa bueltatuta, gogoa ere bai, ilusioa eta gaurko atseden egun honek indarrak berreskuratzeko balioko digu. 

Gogor hasi duzue aurtengo Tourra, ikuskizuna ikaragarria izan da. Tamalez lehen etapetan ezbehar batzuk ere izan dira, lasterketa baldintzatu dutenak. Nola baloratzen duzu?

Hiru asteko itzulietan lehen egunak oso arriskutsuak izaten dira, oso azkar aritzen gara, denok aurrean ibili nahi dugu, tentsio horrek erorketak eragiten ditu eta garrantzitsuena da erorketa horiek saihestea. Batzuetan liderrak erori dira beste batzuetan liderrak ez direnak. Lehenengo egunean tokatu zitzaidan eta lehen eguneko sentsazioak okertu zizkidan. 

Larunbatean gertu izan zenuen etapa garaipena, momentu batean zira hartzera gelditu zinen, gero errepidetik ere atera zinen… Pena pixka bat, ezta?

Bai, huts egite galanta egin nuen. Hotzean pentsatuta beste nolabaitera atera zitekeen eguna baina momentuan erabaki hori hartu genuen, kotxera jaistea zira hartzeko eta une horretan abiadura handitu zuten, mendiko puntuak hartzeko, jaitsieran DMS taldekoak ere oso azkar jaitsi ziren. Ni ere arriskatzen hasi nintzen aurrean sartu nahian eta errepidetik atera nintzen, hor denbora dezente galdu nuen aurreko taldearekiko eta gero hurrengo mendatean indar gehiago egin behar izan nuen berriro aurrekoekin bat egiteko. 

Etapa horretan bertan harrituko zinen Pogacar-ek emandako ikuskizunarekin, ezta? Atzean zenuen bost minutura eta segituan hortxe ikusita… 

Ba bai, badakigu aurreko urteetan ere zer nolako erakustaldiak egin dituen baina batez ere larunbatean eman zuena ikaragarria izan zen. Ez nekien hain gertu zetorrenik, banekien erasoa jo zuela eta atzekoei tartea atera ziela baina guk ere bageneuzkan gure bost minututxoak eta azken kilometroan esan zidatenean 20 segundora neukala, egia esan zur eta lur utzi zidan. 

Esan daiteke lehen postua ia erabakita dagoela ezbehar handirik ez bada gertatzen. Zuek Astana taldean Lutsenko duzue 8. postuan, 6 minutu eta 12 segundora. Berarekin zerbait egiteko asmorik duzue edo etapa garaipenetan dagoen lehentasuna?

Hasieran etapa garaipenetan ibiltzea zen helburua baina behin Lutsenko hor aurrean egonda podiuma ere gauza erreala dela. Hiru asteko itzulia da, edozein gauza gerta daiteke eta nik uste dut berari esku bat botatzea behar duenean normala izango dela, beti ere ihesaldiak eta etapa garaipenak baztertu gabe. 

Taldea nola dago? 

Ondo gaude, Alex [Aranburu] ere oso ondo dabil. Egia da atzo nik uste jende askok pasa zuela hotz asko eta horrek asko baldintzatu zuen. Omar [Fraile] bera ere oso ondo ikusten dut eta ari da erakusten. Herenegungo etapan ere ikusi zen seikote batean bera zihoala tiraka maldan gora eta horrek erakusten du zein mailatan dagoen.