Tramankulu deitu dute batzuk, beste batzuk berriz, tresna. Asier Iñigo NAIZeko marketin saileko arduraduna kanpaina honen sortzaileetako bat da. Hark «artefaktu» deitzen diola adierazi du, ezusteko asko barnebiltzen dituen artefaktu bat. Espoliazioaren mehatxua gainditu berritan, eta pandemiaren ondorioak oraindik neurtzeke daudela, etorkizunerako «oinarri sendoa» finkatu dela nabarmendu du Iñigok, eta «artefaktua» oinarri hori sendotzeko ezinbestekoak izan diren harpidedunentzako opari bat dela.

Eta zer topatuko bertan harpidedunek? Denetarik: informazioa, eduki historikoak edota jokoak. Dena, parte hartzea sustatzeko asmoz. Orain arte artefaktuak harrera bikaina izan duela dio Kristina Fernandez marketin saileko langileak: «Harpidedunak beti daude hor. Gu ere beraiengatik gaude hemen, eta ondorioz, beraientzat».

Eta proiektu guzti honen protagonistak harpidedunak direnez, harpidedun batek ere parte hartu du elkarrizketan. Itsaso Sexmillo nafarra da, osasun arloko profesionala, eta lanetik itzultzean erantzun dio Naiz Irratiaren deiari. Eskuzabalak dira NAIZ eta GARAko harpidedunak; etorkizunari begira, ez die gehiegirik eskatzen langileei, «orain arte bezala jarrai dezatela» besterik ez.