'Damurik ez, bihotza aske' deitzen da The Potes taldearen bigarren diskoa, eta erabat laburtzen du jarduteko duten modua, kantu gordin eta zintzoak direlako haienak. 2018an kaleratu zuten arrasatearrek 'Ametsak dira egi erabat bete aurretik', eta hiru urte pasata heldu zaizkigu horko kantuetatik tiraka atera diren doinu berriak. 

Bertsioetatik haien kantuak sortzera pasa den taldea izanik, hitz eta doinu propioak bilatu behar izan ditu The Potesek. Indarra eta beldurrak, nostalgia eta ametsak agerian geratzen dira haien abestietan; baina batez ere, damuak atzean utzi eta bihotza dantzan jartzeko gogoa pizten digute.