Aspaldiko asmo eta ahaleginak gauzatu dira June Calsorren 'Amalur' diskoan. Hamalau urterekin hasi zen musikari donostiarra kantuak idazten, eta hau lehenengo lan luzea badu ere, musikagintzan hasi zenetik honako bidea oparoa izan da. Pare bat urte eman du disko honetako kantuak lantzen, eta joan den maiatzaren 8an kaleratu du.

Disko berezia da 'Amalur': izan ere, Nazio Batuen Garapen Iraunkorrerako Helburuak daude June Calsorren lanaren oinarrian. Xede horiek munduaren oinarri-oinarrizko eraldaketa bilatzen dute: pobrezia desagerraraztea, planeta babestea eta pertsona guztiei oparotasuna bermatzea. Ideia potolo horiek buruan zituela, inguratzen gaituen mundua eta barruan daramaguna bateratu ditu Calsorrek bere abestietan.