Urria hasieran astebeteko greba arrakastatsua egin zuten Bizkaiko metal arloan ordezkaritza duten sindikatu guztiek deituta. Pasa den astean elkartu ziren sindikatuak eta FVEM patronala eta LAB sindikatuko ordezkari Iratxe Azkuek NAIZ Irratian baieztatu duenez patronalak «beste aukera bat galdu zuen benetako negoziazio bat abian jartzeko». «Oso haserre gaude», esan du behin baina gehiagotan eta gaineratu, ez dakitela patronalak zein estrategia duen baina lortzen ari dena oso argia dela: «langileak gero eta haserreago egotea».

Azkuek azaldu du ez dutela edonola hautatu gaurko agerraldiko lekua. Aceros Inoxidables Olarra enpresaren aurrean elkartu dira sindikatuak, aurrez Sidenor eta Artetxe enpresetatik kotxe karabana eginda. «Bizkaian enpresa handiek hitzarmena bahituta daukate, kriston boterea dute patronalaren barruan». LABeko ordezkariaren esanetan enpresa hauek diote sindikatuek eskatzen dituzten hainbat klausula ezin direla sinatu, subrogazioa kasu. Enpresa hauen jarreraren aurrean, «beraiek hitzarmena bloketazen dute eta guk beraiek blokeatuko ditugu», baieztatu du.

Lan gatazka honetan azpimarragarria da sindikatu guztien batasuna eta Azkuek baieztatu duenez, «argi dugu borroka honekin jarraituko dugula». Bide horretan, bihar Bizkaiko metal arloko patronalak BECen egingo duen ekitaldian mobilizazioa egingo dute sindikatuek. Ostegunean, berriz, negoziazio mahaiaren bilera berria izango dute.