Adi eta Ari | Gogotsu, gogo handiz, gogoz

[2x28] Atal honetan gogotsu, gogo biziz eta gogoz handiz esamoleak landuko ditugu. 

NEREA:
Egun on, Ander.

ANDER:
Hala ekarri, Nerea.

NEREA:
Gogoan dauzkazu Hertzainak musika taldearen azken kontzertuak? Nolako jendetza!

ANDER:
Hertzainak izena entzun orduko, Kortatu taldea gogora etortzen zait beti.

NEREA:
Bai gaupasa bikainak! Haiekin zenbat dantza egin dugun gogoratzeak bihotza alaitzen dit.

ANDER:
Akordatzen al zara ‘Sarri, Sarri’ abestiarekin eta ‘Egunero dena okerrago’ abestiarekin?

NEREA:
Noski. Ska estiloko erritmoak oso aproposak dira festa egiteko.

ANDER:
Gogora ekarri beharra dago berez ingelesezkoak zirela bi kantu horiek. ‘Egunero’ zen The Selecter talde ingelesarena. Eta ‘Sarri, Sarri’ zen Toots and The Maytals talde jamaikarrarena.

NEREA:
Iruñeko Skabidean musika taldeak zuzeneko kontzertu handi bat eman zuen joan den urtean, hamar urte bete zituztenean.

ANDER:
Sarrera guztiak bukatu ziren. Ia mila lagun aritu ziren kantuan eta dantzan. Bi ordu eta erdiko emanaldia izan zen Atarrabiako Totem aretoan.

NEREA:
Hamar laguneko taldea da Skabidean. Soinu benetan ederra dute.

ANDER:
Ba al dakizu zenbat disko atera dituzten?

NEREA:
Bost bat?

ANDER:
Bai. Eta disko berriaren titulua ‘Hiri zahar zikina’ da. The Pogues talde irlandarraren doinu batekin hasten da.

NEREA:
NAIZ Irratiak zuzenean kontatu zuen Skabidean taldearen kontzertua.

SKABIDEAN ZUZENEKO KONTZERTUA

ANDER:
Jendea gogotsu zegoela esan zuen esatariak.

NEREA:
Adjektibo polita da 'gogotsu'. Berotasuna dauka. 'Sutsu' adjektiboaren tankerakoa da. Eta esan nahi du: gogo biziz, gogo handiz, gogo betez.

ANDER:
Skabidean taldearekin gogo biziz salto eta dantza egingo zuten, seguru.

NEREA:
'Gogo' hitza modu askotan jokatzen da euskaraz. Gogo onez da atseginez. Eta gogo txarrez da gogorik gabe, behartuta bezala.

ANDER:
Gogo urriz nagoenean, kemenik gabe egoten naiz, adorerik gabe.

NEREA:
Gogoa da buruaren ahalmenak gordetzen dituena. Horregatik esaten dugu: «Zer daukazu buruan?, zer daukazu gogoan?».

ANDER:
Gogoaren argitasunari esker sortzen dira musika, literatura eta arteak, era guztietakoak.

NEREA:
Ska erritmoekin gogoa alaitu egiten zaigu. Eta istorio tristeekin, gogoa ilundu.

ANDER:
Oroimenari edo memoriari ere gogoa esaten zaio. Hortik dator gogoratu aditza. Eta gogoan izan... ez zaizula ahaztu behar garrantzitsuena.

NEREA:
Hori da: ez da ahaztu behar gogoa dela asmoa. Gogoa da nahia. Gogoa da desira.

ANDER:
Gogoak ematen didana egingo dut nire urtebetetze egunean, nahi dudana.

NEREA:
Londresera joateko asmoa duzula esan zenidan, berriz hara itzultzeko gogoa duzula.

ANDER:
Bai, Nerea, ez dut beste gogorik. Londresko 35. Ska Festibala apirilaren 6an hasiko da.

NEREA:
Nik ere gogoko dut ska musika. Ander, utziko al didazu Londresera zurekin joaten? Esan baietz, mesedez.

ANDER:
Ados! Begira!... 'Gogotsu' eta 'sutsu' hitzek duten antzeko berotasuna dauka «gogoko» hitzak ere. Gogokoa da gustuko duguna eta atsegin zaiguna.

NEREA:
Pertsona bat asko-asko atsegin dugunean, desiragarria izateko neurrian, orduan esaten da oso gogoko dugula. Gogoa pizten zaigu, irritsa ernatzen zaigu: haragizko jolasetarako grina.

ANDER:
Lasai, neska, ez zaitez horrela berotu orain.

NEREA:
Gogoko dut pintxoak jatea. Gogoko dut musika alaia. Gogoko ditut gona motzak. Gogoko dut festetako gaugiroa. Zerbait gustatzen zaigula esateko forma sinplea da.