«Pasa den denboraldian lortutako garaikurren borrokan egotea izango da helburu nagusia»
Bera Bera garaikur hirukoitza irabaztetik dator, eta aurten ere helburua «hauek lortzeko borrokan egotea izango da», Esther Arrojeria jokalariaren hitzetan. Asteburu honetan bertan izango dute iaz lortutako lehen garaikurra defendatzeko aukera, Iberiar Superkopa, alegia.
This browser does not support the audio element.
Dena irabaztetik datorrela esan daiteke Bera Bera, pasa den denboraldian Liga, Kopa eta Iberiar Superkopa irabazita. Aurten ere helburu bera izango dute donostiarrek, edo bai, behintzat, «hauek lortzeko borrokan egotea», dio Esther Arrojeria jokalari usurbildarrak. Hori bai, «Europako arantzatsoa» ere hortxe dute, eta multzoen fasean sartzea izango da aurtengo beste erronka garrantzitsuetako bat. Horretarako, bi kanporaketa gainditu beharko dituzte, lehena urrian bertan Benficaren aurka.