Hogwarts Legacy-ren magiaz betetako munduak harrapatu egin gaitu
Harry Potter aztiaren unibertsoko azken jokoaren ezaugarriak errepasatzeaz gain, bideojokoen munduko gaurkotasunari begira jarri gara.
This browser does not support the audio element.
Horrenbeste urtez zain egon ondoren, azkenik iritsi da Hogwarts Legacy. Avalanche Software-k eta Warner Bros Games-ek sortutako bideojokoan ez dugu Harry Potter ikusiko; hori bai, bere unibertsoa horren erakargarria egiten dituzten elementu guztiak agertuko zaizkigu.
Premisa berritzailea dakar Hogwarts Legacyk: 1800. urtean girotzen denez, aspaldiko magia eta aztikeria ikastetxean ariko gara. Gure pertsonaia sortuta, eskolako lau etxeetako bat aukeratu beharko dugu: Gryffindor, Ravenclaw, Hufflepuff edo Slytherin taldeen artean hautatuko dugu joko hasieran.
Klaseetan parte hartzea, minijokoak bizitzea nahiz Hogsmeade herrixka bisitatzea dira jokoak proposatzen dituenak. Hala ere, istorio nagusiaren ardatza iratxoen iraultzaren da: horri lotuta, borroka mordoan parte hartuko dugu menperatu ditugun aztikeriak erabilita. Egia esan, era guztietako polemikek inguratu dute bideojokoa; hala ere, eskaintzen duenaren inguruan hitz egitea erabaki dugu oraingoan.
Albistegiari dagokionez, ez da asterik zirraragarriena izan bideojokoen jarraitzaileentzat. Dena den, kontutxo interesgarriak aipatu ditugu saioan: adibidez, arazoz jositako Dead Island 2-ren argitalpenari buruz aritu gara.
Team Fortress 2 izan da beste hizpideetako bat. Valve-n multijokalari titulua 2007an argitaratu zen, baina gaur egun munduko lanik jokatuenen artean jarraitzen du —Steam-en 8. postuan dago—. Horrenbeste erabiltzaile dituen arren, azken urteetan ez du eguneraketarik jaso: hori aldatu egingo dela adierazi dute arduradunek.
Bukatzeko, klasiko baten bertsio berria ekarri dugu saiora. The Legend of Zelda: A Link to the Past SNES kontsolako maisulanetako bat da. Zaleek hori hartu, eta hainbat plataformentzako port natiboa eratzea lortu dute sekulako lana egin ondoren.