Bi urte eta erdi pilotalekuetatik kanpo egon ostean, joan den igandean berriz ere zuriz ikusi ahal izan genuen Leire Garai pilotari gasteiztarra. Belauneko lesio larriak luze jo du, eta bidean «une zailak eta zalantzak ere izan ditut», adierazi du. Berriz pilotan aritzeko gai izango ote zenaren zalantza ere planteatu zuen nonork. «Zure esku dagoen guztia egiten duzun momentuan, eta hobekuntzarik ikusten ez duzunean, zaila da aurrera egitea», aitortu du Garaik.

Bide hori, ordea, ez du bakarrik egin. Familiaren, lagunen eta gertukoen babesak hilabete zailenak kudeatzen lagundu diola azaldu du, nahiz eta prozesua gogorra izan den. Orain, frontoira itzuli eta berriz ere pilotari sentitzea da saririk handiena berarentzat. Palmaresean txapelak dituen arren, «orain arte lortu dudan lorpenik handiena itzultzea izan da», dio gasteiztarrak.