Denboraldi hasiera exijentea izaten ari da Bera Berarentzat, eta intentsitateak ez du behera egingo. Aste honetan, erronka «gogorra bezain polita» dute donostiarrek, Anne Erauskin jokalariaren hitzetan. Gaurtik hasita, Imanol Alvarezen taldeak Costa del Sol Malaga hartuko du Gascan, «txapelketako aurkari gogorrenetako bat», zalantzarik gabe. Partida garrantzitsua oso, kontuan hartuta Elxen aurka galtzetik datozela gipuzkoarrak, eta asteburuan Europako lehen hitzordura «sentsazio onenekin iristea premiazkoa dela».

Denboraldi hasieraren balantze positiboa egiten du Erauskinek, «talde erdia berria da eta honek prozesu bat eskatzen du berriz elkarren artean ulertzeko, eta nik uste lan hori nahiko ondo egin dugula», dio ermuarrak. Era berean, azken porrota, Elxen aurkakoa, «zertxobait mingarria» izan dela onartu du, «taldea dinamika oso onean zegoelako». Hain justu, gaur dute pasa den asteburuko zapore gazi hori gozotzeko aukera, «Malagaren aurkako partida gogorra izango da hasieratik bukaerara arte», dio Erauskinek. «Oso kontzentratuta egon behar dugu eta intentsitate maila altuarekin jokatu», gaineratu du.

Begiak baina, Europan ere jarrita dituzte, hauxe baita «denboraldiko helburu nagusia». Oso motibatuta daudela azaldu du Bera Berako jokalariak, «partida on bat egiteko asmoz goaz Portugalera». Benfica «talde potentea» dela nabarmendu du ermuarrak, «jokalari on asko dituzte, baina inoiz baino aukera gehiago ditugu kanporaketa pasatzeko».