Kopuru zehatzak eskaintzea oso zaila den arren, Save The Children gobernuz kanpoko erakundeak emandako datuak ez du egoeraren larritasuna zalantzan jartzeko tarterik uzten: 21.000 haur baino gehiago daude Gazan desagertuta. Batzuk desagertuta eta noraezean, 17.000 inguru, beste batzuk hondakin artean lurrazpian, hobi-komunetan topatu diren hainbat gorpu haurrenak direnak ere baieztatu da eta, horrez gain, atxilotutako ehunka haur ere badirela diote hainbat eta hainbat eragilek.

Pilar Kaltzada Save The Childreneko Espainiar Estatuko presidenteak laguntza humanitarioa bideratzeko dituzten zailtasunak azpimarratu ditu: «babesleku izendatutakoak ere ez dira babesleku, ez dago bertara jotzeko leku segururik». Su-etena beharrezkotzat jo du laguntza humanitarioa modu jarraituan eta berme guztiekin eskaini ahal izateko. Zentzu horretan, erakundearen lana humanitarioa dela azaldu du eta lan politikoa egitea dagokienei huts egitea leporatu die.