Uda gaur hasi arren, Irunen martxan daude San Pedro eta San Martzial jaiak. Lehen ekintzetako bat izan da Mala Rodriguezen kontzertua, eta jazoera ezin xelebrea gertatu da. Gizon bat eszenatoki gainetik jausi da Super Man imitatzen. Ezinbesteko lurreratzearen bideoa birala bilakatu da Bidasoaldean, udan egin behar ez den zorakerien adibide gisa.

Maltan, berriz, oporretan saihestu beharrekoa egin dute: selektibitateko notak ikusi. Biologia nahiko kaxkar atera zaio Albari, eta sareetan segituan zabaldu da lagunak egin dion errieta. Azkenik, parranda gauen ostean, hobe autobusa hartuz gero. Zehazki, Eibar eta Arrasate artekoa hartuz gero, ez da beharrezkoa PortAventurara joatea.