Esango duzue, «maitia nun zira, nik ez zaitut ikusten, ez berririk jakiten… nurat galdu zira?» eta ez dizuegu erantzungo. Bueno, bale, azken honekin pixka bat pasatu egin naiz. Eta, bai, gure eduki guztiak entzun ditzakezue NAIZ Irratiaren webgunean, nahi izanez gero. Baina, gustatzen zaigu epiko jartzea tarteka, utziguzue. Ai… Teknologiak bizitzaren poesia erabat izorratu du. Kontua da, momentuz, gaur gaurkoa gozatzeko proposamena luzatu nahi dizuedala.

Hasteko, Gaizka Izagirrek 'Bella Italia'-ra eramango gaitu pelikula eta telesailen bitartez. Nera baldak, 'Udakurketa' atalean, ipuin-liburuen gomendioak ekarriko dizkigu; batzuk labetik atera berriak. Eta, gure azken gonbidatua, zirkuluaren perfekzioarekin tematuta gaudenez, eta herriak hala eskatu duenez, berriro, zuentzat guztiontzat Lander Garro handia etorriko da.